Воскресението Христово е настан кој му дава смисла на создавањето на овој свет. Православните христијани со неизмерна радост го очекуваат големиот христијански празник Велигден. Нема поголема радост и восхит од онаа кога се празнува животот. На Велигден се разгласува радосната вест за воскресението Христово, па затоа овој ден треба да се слави и одбележува со спокој во душата, радост во срцето и насмевка на лицето. Христовата победа над смртта е победа којашто Синот Божји ја извојува за целокупното човештво и за сиот свет. Славењето на Велигден укажува дека ризницата на нашето духовно и национално богатство е богата и ја симболизираат верата и богатата македонска традиција која опстојува со векови.
Велигден е празник над празниците, затоа нека ни бидат светли празничните денови, да бидеме вистински искрени големи луѓе, верата да не обединува, а од нашите желби и мечти зависи светлината на утрешниот ден.
Оваа година, со славењето на Велигден на 1 мај, исто така, ќе се одбележи и Денот на трудот кој е меѓународен празник и е посветен на борбата за зачувување и унапредување на правата на работниците.
Децата во градинката „Срничка“ достоинствено ги одбележаа овие два празника. Со пригодни стихови, текстови и ликовни творби ги потврдија елементарните знаења за Денот на трудот, а вапсањето и декорирање велигденски јајца кои се симбол на новиот живот и се неодминлив дел од Велигден и велигденските обичаи, децата го правеа вешто со голема љубов. Вапсувањето придружено со велигденски песни за нив е еден од најрадосните и најубави обичаи. На тој начин настојуваме да ги негуваме и пренесуваме обичаите и традицијата, кај децата да го вкорениме чувството на почит кон овој празник, децата празнични песни да пеат, во нивните очи сончеви огнови и љубов да тлеат.
СРЕЌНИ ВЕЛИГДЕНСКИ ПРАЗНИЦИ!
НЕКА НИ Е ЧЕСТИТ ДЕНОТ НА ТРУДОТ!
ВЕЛИГДЕН
Иде убав празник
иде светол ден,
камбаните бијат –
иде Велигден.
Велигден е празник
пролетен и цветен,
радост тој му носи
на секое дете.
За Велигден морам
да ви кажам вака,
црвеното јајце
најмногу го сакам.
ПРВИ МАЈ
Први мај е празник голем
што го слави сиот свет,
огреан од топло сонце
украсен со убав цвет.
Железничар, морнар, пилот
орач од далечен крај,
со радост го слават сите
празникот Први мај.